LA Lights Halao Jogu no Konsertu Iha Aileu

Aileu; Kompania sigaru LA Lights la buka deit lukru,maibe saida mak sira hetan husi komunidade Timor Leste liu husi sasan ne’ebé iha sorin balu mós ofrese fali joven liu husi atividade boot rua hanesan jogu futsal ho naran Street Soccer no konsertu musika artista Timor oan rasik (Aimalae red) no Indonezia (Bali),iha kampu futbol Distritu Aileu hahu husi loron 28-29/09/2013.

Distritu Aileu foin ba dahuluk hare’e no asiste buat ida boot no foun tebtebes ne’e halo komunidade Distritu Aileu sai admira ho programa husi Kompania LA ne’e, eventu boot 2 ne’e LA oferese ona ba iha Distritu balu hanesan Lautem,Baucau no Ermera no iha loron 28-29 Stermbru oferese fali ba Distritu Aileu no sei kuntuinua ba Distritu Liqueça.

Posse Hamutuk; Husi sorin karuk Graciana Gunawan (hamrik/uza kamizola mutin)ne’ebé hanesan mos nain ba Kompania LA Lights pose hamutuk ho autoridade lokal Distritu Aileu no klubes ne’ebé mak tama ba Final,jogador diak liu no jogador ne’ebé hatama golu barak liu.Foto L.F/Martinho da.Costa

Eventu ne’e LA ofrese gratuitu ba komunidade iha Distritu Aileu, iha ne’eb’e konsege rejistu klubes 14 hodi partisipa iha eventu futsal Street Soccer  ho nia modelu kampu 25 x 15 metrus,ho haleu ho rede,iha karpeta masa ne’ebé monta tuir medida kampu ho nia risku tuir kampu futsal nian, kada klubes iha deit joga do’or nain 5, nain 4 joga no nain 1 rezerva,oras hodi determina joga mak tuir musika ne’ebé komisaun prepara ona,kada babak ho musika 2, siknifika musika 4 entaun joga remata.Hafoin ne’e iha loron 28 /09/2013 kalan oras 7:00 to tuku 11:00 hahu kedas ho konsertu musika, no iha loron 29/09/2013 tama ba Semi final no final,husi rezultadu final entre klubes 2 (Atletihco ho Junais A) Atleticho mak sai manan nain ho hetan orsamentu husi komisaun organizadora $ 250,klubes ne’e rasik mak sei reprezenta Distritu Aileu ba eventu kuntuinuasaun iha nasional iha tinan oin (2014) .

Iha Abertura Administrador Distritu Aileu koalia ho lian/dalen Indonesia hateten “ lori komunidade Aileu nian naran hakarak agradese tebes ba LA tamba bele deside Aileu sai mos fatin hodi implementa programa ida boot tebes,komunidade Aileu hamrok tebes ba animasaun sira hanesan oras ne’e dadaun LA implementa,ho atividade hirak hanesan ne’e bele hametin liu tan ita nia relasaun ba futuru”

Administrador Martinho Matos hateten tan katak “ ne’e duni husu ba klubes sira ne’ebé partisipa iha jogu ne’e atu hatudu imi nia disiplina nu’udar atleta ne’ebé diak no professional,tamba  ita Distritu Aileu iha nia kultura ida uniku mak hakribi’i violensia,ne’e duni hatudu duni imi nia identidade nu’udar Aileu oan,hodi hetan konfiansa husi komunidade no kompania LA rasik,ba komunidade jeral  atu hatudu mos matotidade nu’udar Aileu oan iha eventu jogu no konsertu musika ne’ebé artista mai husi estranjeiro (Indonezia red) ne’e duni haksolok ba tamba durante ne’e ita hamrok tebes ho animasaun”

Reprezentante kompania LA Sufudidyo Gunawan iha nia diskursu hateten “ kompania LA Lights iha Timor atraves husi buka lukru,hakark mós ajuda governu hodi hakasa’e kapasidade juventude liu husi hatudu talentu desportiva nian,iha atividade ne’e ami buka ekipa ida diak liu hodi reprezemta Distritu hodi partisipa iha eventu hanesan iha anivel nasional”

Sufudidyo ne’ebé ho istima Pak Gunawan ne’e esplika tan katak “ atividade hanesan mós kompania halao ona iha Distritu Lautem,Baucau no Ermera, hafoin iha Distritu Aileu ne’e,sei kuntuinua ba Distritu Liquiça,iha programa ne’e LA Lights organiza eventu boot 2 hanesan futsal Street Soccer no konsertu musika artista husi Timor oan rasik no husi Indonezia,buat hirak ne’e kompania oferese gratuita ba komunidade iha Distritu Aileu”

Gunawan iha nia liamenon hateten “ hatudu ba imi nia talentu liu husi jogu ne’e,laos atu tebe malu ou baku malu,tamba jogu ne’e atu hatudu imi nia modelu/gaya joga laos tebe malu,husi jogu ne’e sei fó mos premeiu ba ekipa ne’ebé manan,joga do’or diak liu no ema ne’eb’e hatama golu barak liu”

Reprezentante kamandante PNTL Distritu Aileu Helio de.Deus hateten “ agradese ba kompania LA Lights tamba bele deside Distritu hodi implementa ita boot sira nia programa,orgullu tebes ba ami Aileu oan sira tamba programa ne’e hanesan buat foun ba ami,wainhira halo konsultasaun ho parte PNTL ami hanoin hanesan buat bai-bain ida,maibe la hein katak buat ne’ebé ita boot sira halo uniku fali no halo ami admira tebes tamba sa buat boot ida hanesan ne’e bele akontese iha ami nia Distritu Aileu”

Komandante operasaun Distritu Aileu ne’e hateten tan katak “ ami PNTL prontu atu garantia siguransa durante eventu boot 2 ne’e halao,sa tan buat ne’e hanesn buat foun ami fiar komunidade injeral sei sei ho laran nakloke no husu ba maluk joven sira atu kuntribui hodi halo susesu programa ne’e hodi labele lakon opurtunidade iha tempu tuir mai”

Distritu Aileu sai nabilan tiha iha kalan 28/09/2013 tamba palku ne’ebé uza ba konsertu kompania monta Lampu oioin hodi halo fatin ne’ebé nakukun sai naroman,no komunidade no joven nakonu iha kampu futeboll hodi aziste konsertu hodi dahur no haksoit wanhira band Timor Leste (Aimalae) no Band husi Bali Indonezia hananu,entertantu atividade lao ho susesus tebes iha siguransa ne’ebe hakmatek, no mós iha loron 29/09/2013 loron kraik hahu semi final no final ba jogu futsal,iha jogu ne’e sai manan ba haluk mak Atleticho ho hetan premiu osan $ 250,jogador diak liu mai husi Klubes Foscaca ho numero 8 hetan osan $100, no jogador ne’ebé hatama golu barak liu mai husi klubes Junais A ho numero 10 ho osan $.150.Martinho da.Costa

Membru PF Mak Fini Ukun Nain

Aileu; loron 16/09/2013 iha salaun enkontru administrasaun Distritu Aileu membru parlamentu foinsa’e (PF) hamutuk ho reprezentante SEJD ou Sekretaridadu PF nasional no Distritu aprezenta delegadu hirak ne’e ba autoridade lokal Distritu Aileu hafoin liu husi elisaun,selesaun no tomada de posse.

Hafoin membru PF hetan tiha sira nia tomada de posse iha fulan kotuk (jullu) atu agradese ba autoridade lokal Distritu to’o suku ne’ebé durante ne’e hamutuk halo susesu ba eleisaun no selesaun ba membru hirak ne’ebé reprezenta Distritu Aileu  ba iha PF nasional,atividade ne’e organiza husi SEJD liu husi sekretariadu PF.

Membru PF hirak ne’e simu dereita husi Adjuntu administrador Distritu Aileu Abel da.Conceição,ho xefe departementu hirak ne’ebé eziste iha Administrasaun Distritu Aileu hanesan Xefe departementu finansas, departementu Rekursu Humanus, Obras Publik, koperativa, Sanimentu, reprezentante Administrador Sub Distritu Aileu vila, reperezentante komisaun estaladora municipiu no siguransa sivil. Membru PF hirak ne’e akompana husi reprezentante SEJD/Sekrtariadu PF Marcos da.Costa no Reprezentante SEJD Distritu Aileu.

Foto hamutuk : Membru Foinsa’e 8 ho hatais farda PF ko’or  azul ho logo SEJD foto hamutuk ho reperezentante SEJD nasional no Adjuntu Administrador no Autoridade lokal Distritu Aileu iha Salaun Enkontru Aadministrasaun Distritu Aileu,16/09/2013.Foto Martinho da.Costa

Iha Diskursu Reprezentante SEJD Marcos da.Costa hateten “ sormutuk ida ne’e hanesan parte ida atu hato’o deit agradese ba autoridade lokal Distritu to’o suku sira hotu ne’ebé durante ne’e fó ona sira nia kontribuisaun hodi halo susesu programa eleisaun to’o selesaun ba membru FP ba dahruak periodu 2013-2015”

Marcos da.Costa hanesan Aileu oan ne’e mos hateten tan katak “ membru PF hirak ne’e hanesan aset ita Distritu Aileu nian,ne’e duni ita presija tau matan hodi prepara ba futuru rai ida ne’e ninian tuir lema SEJD nian “Tane Foinsa’e Fini Ukun Nain”,132 difisient 2 mane 1 feto 1

Marcos hateten tan katak “ husu ba autoridade lokal sira atu involve membru PF hirak ne’e iha programa Distritu nian hanesan sorumutuk,formasaun no atividade seluk ne’ebe presija mós sira nia kontribuisaun, no ba membru PF sira atu buka aprende ou estuda makas nafatin no buka kolabora nafatin ho entidade hotu  alende aumenta kapasidade no esperensia no  tulun mos autoridade sira karik buat hirak ne’ebé sira labele to’o ba”

Iha fatin hanesan Adjuntu Administrador Distritu Aileu Abel da.Conceição hateten “ governu prekupa ho lideransa ba futuru mai hodi troka lideransa tuan sira ne’ebé iha,ne’e duni governu iha dever ida hodi prepara lideransa foun ba futuru,hakarak ka lakoi loron ida lideransa tuan sira tenke husik duni sira nia kna’ar hodi fó fali ba lider foinsa’e sira”

Abel hateten tan katak “ imi nain 8 nu’udar membru PF husi Distritu Aileu imi mak reperezenta joven rihun ba rihun hosi Distritu ida ne’e, ne’e duni tenke hatudu nafatin karakter nu’udar Aileu oan no kaer nafatin ita nia kultura ne’ebé uniku iha nasaun Timor Leste mak hakri’ibi violensia no buka nafatin hodi aprende no keta haluhan buat hotu lao kompleita tenke hapar mós ho imi nia estudu sira”

Entertantu hosi sorin seluk Xefe departementu Sanimentu Ministeriu Estatal Distritu Aileu Fausto do Carmo hateten “ agradese tebes ba SEJD tamba bele organiza hodi prepara fini ba ukun nain sira hanesan dadaun ne’e, tamba nasaun atu lao diak presija lideransa ne’ebé diak”

Fausto iha nia liamenon katak “ husu atu membru PF atu aprende barak no tenke mós hapar  mos imi nia atividade hirak ne’e ho nivel edukasaun  sei lae imi sei la avansa/gagal  maske imi aprende buat barak maibe nivel edukasaun sei la suporta mak labele halo buat ida”

Ba L.F membru PF Basilio dos.Santos no Eriana de Andare hateten “ hafoin simu tiha toma de posse hanoin katak sira dereitamente halao kna’ar kedas nu’udar membru PF,maibe ohin halo tan istoria foun ida ba sira tamba sira nain 8 bele dereita hasoru malu ho autoridade lokal Distritu ne’e nian hodi bele rona sira nia konsellu atu labele difikulta sira nia kana’ar iha futuru mai

Basilio dos Santos membru PF husi Sub Distritu Liquedoe ne’e hateten “ hau kontente tebes tamba bele mai hasoru malu ho autoridade lokal Distritu nian simu motivasaun foun no hetan mós esperensia foun hodi bele fó kbi’it liu tan mai ami hodi halao ami nia kna’ar ho esperansa ne’eb’e forte tebes ba iha futuru mai”

Erina de Andrade Membru PF husi Sub Distritu Remexio hateten “ agradese tebes ba autoridade lokal Distritu Aileu nian ne’ebé mak partisipa iha sorumutuk ne’e hodi fó esperansa ba ami nain 8 hodi bele kuntuinua kna’ar hirak ne’ebé joven fó ho responsavilidade no bele hetan konfiansa boot husi lider Distritu nian  no injeral komunidade Distritu Aileu”

Sormutuk entre membru PF ho autoridade lokal Distritu Aileu ne’e hanesan motivasaun ida ba membru PF nain 8 husi Distritu Aileu hanesan Rafael Martins Tilman husi Sub Distritu Aileu Vila, Mariana Duli Fatima ( Aileu Vila), Basilio dos Santos Ximenes (Liquedoe), Zelia Mesquita (Liquedoe),Eriana de Andrade (Remexio),Ronaldo Lopes da.Costa (Remexio), Abrão Araújo (Laulara) no Maria da.Costa Saldanha (Laulara) hodi bele halao sira nia kna’ar ho diak, entertantu atividade ne’e halao iha Salaun enkontru administrasaun Distritu Aileu ho susesu no remata ho hasai foto hamutuk.Martinho da.Costa

SFCG organiza Forum Nakloke Juventude

Aileu; atu promove asaun positivu hodi kontribui ba prosesu demokratiku, hari’i dame no transformasaun konflitu iha Timor Leste Ong internasional Ser For Common Graund (SFCG) organiza forum espazu nakloke ba juventude iha Distritu Aileu,ne’ebé halo iha Salaun Bombeiros Distritu Aileu loron 20-21/09/2013

Pawai; Partisipante forum nakloke juventude halao pawai haleu kapital Distritu Aileu hodi komemora loron internasional ba paz,hafoin remata forum juventude Distritu Aileu,loron 21/09/2013.Foto Martinho da.Costa

SFCG hahu nia misaun iha nasaun Timor Leste iha fulan Abril 2010,liu husi  kopera ho Konsellu Nasional Juventude Timor Leste (KNJTL) tinan-tinan organiza forum nasional hodi halibur reprezentante foinsa’e sira husi Distritu13 iha Timor laran tomak desde 2010.Bazeia ba esperensia husi forum nasional no rejional me’eb’e halao tiha ona,foinsa’e sira ne’ebé partisipa hatudu duni sira nia unidade no iha sentidu responsabilidade hodi halao diskusaun ho diferensia opinaun maibe buka atu atu hetan interese komún ba assuntu hirak ne’ebé mak afeita ba fonsa’e injeral iha Timor Leste.

Atividade  forum nakloke ne’e marka prezensa husi autoridade lokal hanesan administrador Distritu Aileu Martinho S Alves matos,Komandante PNTL Distritu Aileu Sebastião Alves Quintão,Reprezentante Komisaun Estaladora Municipiu Januario Mesquita, Orador juventude Abril Pereira Belo,reprezentante SFCG Fernando C no KNJTL nasional. Atividade refere loke deritamente husi Administrador Distritu Aileu.

Iha Diskursu abertura Administrador Disteritu Aileu Martinho Siqueira Alves Matos hateten “ ha’u rekuiñese katak nu’udar administrador Distritu labele halo buat barak ba juventude sira tamba buat hotu sei konsentradu hela,atividade hotu kona ba juventude nian durante ne’e sei garantia hela deit ba sekretaria estadu juventude no desportu (SEJD) iha ministeriu relefante balu la iha orsamentu ba apoiu atividade juventude sira, susar tebes buat hotu hein deit SEJD,maibe agradese ba sosiadade sivil sira ne’ebé durante ne’e halo progrma ba juventude”

Administrador ne’ebé ukun Sub Distritu 4 ne’e hateten tan katak “ juventude mak papel importante ba dezenvolvimentu,iha programa V governu sei hari’i municipiu ba 13 maibe sei loke uluk ba Distritu 4 ou 5,entaun atu hakat ba iha programa ne’e (municipiu red) presija rekursu humanu ne’ebé sufisente mós,entaun liu husi programa hirak ne’e juventude sira buka atu bele halo preparasaun kapasitasaun iha areia oi-oin.”

Iha rekumendasaun Administrador hateten “ joven sira lalika involve iha krime hanoin inan-aman sira nia kolen,inan-aman sira la husu na buat ida ba imi maibe sira husu atu imi buka aprende hodi atende imi nia moris rasik iha futuru mai,no husu atu identifika problema jerais ne’ebé mak imi hatene liu husi forum ne’e no husu atu nia rezultadu husi forum ne’e informa ba hau atu bele hatene saida mak juventude Distritu Aileu nia hakarak”

Entertantu Koamnadante PNTL Distritu Aileu iha nia palestra hateten “ PNTL la iha idelojia maibe iha deit filosofia ne’eb’e hateten “Polisia mai husi povu,serbisu ba povu no loron ida sei fila ba povu” hare’e ba filosifia ne’e PNTL mós serbisu tuir nia lema “ Servi Lei No Ordem”  hodi tau siguransa ba populasaun nasaun Timor Leste tomak la hare’e ba grupo ou individual tuir filosofia no lema ne’ebé  PNTL iha”

Komandante PNTL Distritu Aileu ne’e hateten tan katak “ PNTL iha Distritu Aileu iha membru ativu hamutuk ema 98 kompustu sub Distritu 4 hanesan Aileu Vila,Laulara,Liquedoe no Remexio,husi numero ne’ebé iha seidauk bele kobre populasaun Aileu tuir sensus tinan 2010 hamutuk 44.325,tamba iha kolaborasaun diak ho identidade hotu iha Distritu Aileu mak oras ne’e Aileu mak sei hetan nafatin numero ba dahuluk siguransa lao ho diak iha Timor laran tomak, tan matenek no kaer metin ba kultura ne’ebé iha, komunidade injeral Distritu Aileu mantein nafatin siguransa iha Distritu ne’e”

Komandante Distritu Aileu ne’e hateten tan katak “ buat ida siguransa ne’e los deit parte PNTL no FFDTL nia kna’ar deit,maibe ema hotu-hotu tenke tau siguransa ba nian rasik no to’o mos komunidade sira,karakter ema Aileu mak hakruk hodi rona no halo tuir maibe a’at mak fasil atu tuir ema seluk/terbawa arus,ne’eduni karik iha problema balu PNTL nia odamatan nakloke ba ema hotu hodi ba hato’o saida mak ladun kona ba komunidade nia laran”

Entertantu Abril Pereira Belo nu’udar orador juventude hateten “ hau uluk ema hotu hakribi tebes tan ba problema boot ne’ebé akontese iha Distritu Ainaro,iha ne’ebé ami hamutuk ho maluk barak ba sunu komunidade nia uma, ema balu mate no mós ema barak lakon sira nia rikusoin,hahalok ne’e hau komete tan faila iha lideransa sira,lideransa sira ladun tu’ur hamutuk hodi rezolve problema to’o ikus mosu problema boot ida tenar ho naran problema soru_Ainaro,problema nia hun mak halai ba arte marsiais (KORK no TORK red)”

 Abril ho naran bolu Joel ne’e haktuir tan nia istoria katak “ikus mai hau hetan kapturasaun hosi polisia hamutuk ho lideransa balu hodi ba hatan krime ne’ebé ami komete,dezisaun ikus husi tribula ba hau mak kastigu komarka tinan 2, laran susar tebes/penyesalan hahu mosu maibe atu dehan saida tan baut hotu mosu ona, iah komarka laran sempre hetan pangkada/baku antes han ou deskansa,loron-loron buat ida lia fuan trata no pangkada simu hela deit, atu dehan saida tan,simu deit na saida mak mosu ne’e”

Ho laran teriste Joel koalia tan “ hafoin ne’e muda fali hau husi komarka Becora ba Gleno (Ermera red),wanhira sae kareta ne’ebé taka metin hanesan kareta tulan terorista sira husi Becora ba Gleno  ho borgol iha liman,ita so rona deit mak kareta ou motor nia lian maibe la hare nia modelu saida,susar tebtebes familia sira ba visita ema termina kedas oras,han oituan deit,baut hotu lao ho oras hotu,maibe tan grasa Maromak nian husi komarka gleno ne’e mak determina hau nia mandatu iha komarka ne’e remata,hafoin sai mai iha odamatan boot komarka Gleno hau hakneak hodi rei rai hodi jura kedas hau lakoi komete tan ho hahalok a’at sira hanesan ne’e”

Ho liafuan ikus hodi fó motivasaun ba maluk partisipante juventude sira iha forum ne’e Joel ne’ebé oras ne’e serbisu hanesan PAAS ( Pessoal Apoio Administração Suco)/Sekretaris Suku Seloi kraik ne’e hateten “ maluk joven sira imi mak sai hanesan matan no tilun ba maluk joven sira seluk,ne’e duni hatutan ba maluk joven sira seluk katak hahalok sira uluk ami komete ne’e sei lori impaktu ladiak ba imi nia futuru, imi imanija rasik ho istoria sira ne’ebé ha’u konta ba imi,susar tebtebes buat ida libre ne’e mak la iha duni wainhira iha komarka laran,ema hakribi ita,ema sei bolu ita eks priozeneiro/komarka atan, kundu ita halo sala ruma iha komunidade nia laran sira sei bolu ita hanesan temi ona,ne’e duni buka atu aprende buat ne’ebé mak diak hodi bele hare’e ba futuru ne’ebé diak”

Entertantu atividade ho tema “ Asaun Foinsa’e Ba Mudansa Liu Husi Transformasaun Pesoal”ne’ebé halao iha salaun Bombeiros Distritu Aileu ho partisipante hamutuk 37 (mane 23 no feto 14) ne’e konsege levantamentu isu lubuk ida hosi debate liu-liu ba isu jeral ne’ebé akontese iha Distritu ida ne’e, partisipante sira hotu halao pawai haleu kapital Distritu Aileu hodi komemora loron internasional ba Paz/Dame nian ne’ebé monu iha loron 21 Setembru, ikus husi atividade ne’e mak fahe sertifikadu ba partisipante  forum ne’e.Martinho da.Costa

ETP Aileu Remata Estaziu

Aileu; durante fulan 2 nia laran estudante 66 husi eskola tekniku profissional Distritu Aileu halao estaziu iha instituisaun governu,Sede Suku,Ong, no Seitor Privadu,hahu husi loron 02/05/ to’o 27/06/2013, no remata ho festa agradesementu iha salaun ETP Aileu loron 29/06/2013

Aileu; eskola tekniku profissional (ETP) hanesan eskola tekniku ne’ebé uniku atual iha Distritu Aileu,ne’ebé halai liu ba areia ekonomia no komersiu. Atividade estaziu ne’e foin ba dahuluk eskola ne’e implementa ba alunus hamutuk 66 fahe ba mane 27 no feto (39).

Atividade estaziu ne’e tama mós hanesan kurikulum ida hodi kompleita sira nia estudu durante sira estudu iha eskola refere. Atividade refere hetan tulun orsamentu husi ministeriu edukasaun hodi fasilita prosesu tomakdurante fulan 2 estudante hirak ne’e halo sira nia estaziu, iha Sub Distritu 4 Distritu Aileu nia laran.

Loron 27/06/2013 mak hanesan loron ikus estudante sira halao estaziu,no remata ho festa agradesementu iha salaun eskola refere loron 29/06/2013,partisipa mós Direktór edukasaun Distritu Aileu,Direktór ho metri/a eskola refere,inan-aman alunus sira nian no mós estaziadu sira.

Atividade inseramentu estaziu ETP Aileu ne’e halao iha eskola refere no insera husi Direktór Edukasaun Distritu Aileu Isac Sarmento.

 Posse hamutuk;ne’e mak estudante ETP ne’ebé durante fulan 2 halo sira nia estaziu iha Administrasaun Distritu Aileu,foto hamutuk iha edefisiu Administarasaun Distritu Aileu. Foto L.F/Martinho da.Costa

 

Iha Diskursu Isac Sarmento hateten “ atividade ne’e hanesan mós atividade aprendezasen ida maibe la halao iha aula laran, estudante sira ba aprende iha fatin seluk alende ho materia ne’ebé sira hetan hodi implementa ou sira mos bele hetan esperensia foun balu iha fatin ne’ebé sira halao estaziu ba”

Isac hateten tan katak “ tinan hirak liu ba alunus periodu dahuluk no dahruak nian la hetan opurtunidade hodi ba halo estaziu no alunus klase dahtoluk ba periodu 2012/2013 mak foin hetan aprovasaun no apoiu finansamentu husi ministeriu edukasaun hodi implementa estaziu ba tinan ida ne’e”

Direktór ETP Aileu Luciano de Araújo iha nia Diskursu hateten “ eskola ne’e hari’i iha loron 11/09/2007 no alunus 250 resin mak remta ona sira nia estudu iha eskola ne’e,maibe sira ne’ebé remata liu ba la hetan opurtunidade  hanesan tinan ne’e ba estaziu,tamba la iha aprovasaun ba proposta ne’ebé hatama ba ministeriu edukasaun,hafoin parte eskola tenta hatama fila fali proposta foin hetan aprovasaun hodi implementa estaziu ba tinan ida ne’e”

Luciano hateten tan katak “ fatin ne’ebé alunus sira ba halo estaziu mak hanesan Administrasaun Distritu ema 12, Administarsaun Sub Distritu AileuVila (5),Laulara (6),Remexio (5),Liquedoe (5),ONG Plan (4),Word Vision (4),Centru Treinamentu Rekursu Aileu (4),Sede Suku Aisirimou (9),Sede Suku Malere (8) no kompaiña Nusabe (4).

Husi sorin seluk estaziadu periodu 2012-2013 Juleita da.Silva no Matias Gonçalves hateten “ senti orgullu ho programa estaziu ne’e tamba bele aumenta liutan sira nia kapasidade, programa ne’e mós hanesan buat foun ba sira,tamba iha sira nia periodu mak hetan oportunidade hodi tuir estaziu ne’e”

Juleita da.Silva ne’ebé halao estaziu iha Departementu Rekursu Humanu Administrasaun Distritu Aileu hateten “ iha estaziu ne’e nia hetan esperensia foun balu ne’ebé iha eskola la hetan liu-liu serbisu administrasaun nian, buat seluk  mak iha fatin ne’ebé nia halao estaziu ba nakonu ho dadus sira kona ba forsa fungsaun atual Aileu nian,tamba bele hatene total fungasionariu hira mak serbisu iha Aileu no serbisu iha ne’ebé”

Juleita hateten tan “ saida mak nia hetan liu husi estaziu ne’e bele fó motivasaun atu bele aprende liu tan, no bele implementa iha eskola ou fatin seluk karik remata eskola”

Iha tempu hanesan mos Matias Gonçalves hateten “ estaziu ne’e hanesan buat foun ba sira,hanoin lia fuan estaziu ne’e ba deit sira ne’ebé estuda iha universitariu, maibe buat ne’ebé fó sai husi eskola sai duni realidade hodi haruka ami tuir lista ne’ebé pre-para tiha ba halo estaziu iha fatin ne’ebeé determina ona, liu husi atividade ne’e bele aumenta liu tan kapasidade hodi prepara ba futuru”

Matias ne’ebé halo estaziu iha departementu Sanimentu Distritu Aileu ne’e hateten tan “ nu’udar estaziadu la haluhan nia hato’o agradese ba parte hotu ne’ebé ajuda ona sira hodi halo susesu estaziu ne’e to’o loron ne’ebé determina, liu-liu ba ministeriu edukasaun,parte eskola,administrador Distritu,Sub Distritu,ONG,kompaiñia privadu, xefi suku no parte seluk ne’ebé ajuda halo susesu programa ne’e.

Entertantu atividade estaziu ne’e hahu husi loron 02/05/-27/06/2013,tuir informasaun no observsaun L.F katak estaziadu 12 ne’ebé halo estaziu iha Administarsaun Distritu desloka iha departementu hanesan, Rekursu humanu,apoiu teknik adminsitrasaun,Planeiamentu Distrital,Sanimentu no Sosial, no atividade ne’e taka ho festa agradesementu iha Sede suku Aissirimou loron 27/06/ no agradesementu final halao iha Salaun ETP Aileu iha loron 29/06/2013.Martinho da.Costa